Փոքրիկ երկվորյակների որդեգրման գործընթացը կասեցված է. Մանե Թանդիլյանը հանդիպել է երկվորյակներին թողած մորը

ՀՀ ԱՍՀ նախարարի ԺՊ Մանե Թանդիլյանը այսօր հանդիպում է ունեցել Գյումրու երեխաների տանը գտնվող երկվորյակների մայրիկի հետ: Այս մասին նա տեղեկացրել է իր ֆեյսբուքյան էջում գրառում կատարելով.

«Հարգելիներս, Այսօր հանդիպում եմ ունեցել Գյումրու երեխաների տանը գտնվող երկվորյակների մայրիկի հետ։ Նա ցանկություն է հայտնել վերադարձնել իր փոքրիկներին և զբաղվել նրանց խնամքով։ Հանդիպման ընթացքում ձեռք բերվեց պայմանավորվածություն, որ երկամսյա ժամկետում երկվորյակների մայրիկը կանի իրենից կախված առավելագույնն՝ իր սոցիալական կարգավիճակը բարելավելու երեխաներին իր հոգածության տակ վերադարձնելու նպատակով։ Հետևաբար, ներկայումս փոքրիկ երկվորյակների որդեգրման գործընթացը կասեցված է։ Միևնույն ժամանակ արդեն իսկ մշակել ենք ճանապարհային քարտեզ մայրիկին անհրաժեշտ և համապարփակ սոցիալական աջակցություն տրամադրելու համար։

Անձամբ շնորհակալություն եմ հայտնում բոլոր նրանց, ովքեր անտարբեր չեն մնացել և հայտնել են իրենց պատրաստակամությունը մայրիկին և փոքրիկներին աջակցելու համար։ Այս հարցը հնարավոր է դառնում լուծել հասարակության և պետության կազմակերպված և միասնական մոտեցման և վերաբերմունքի առկայության պարագայում։ Կարող եք շարունակել աջակցության ձեր առաջարկները ուղարել իմ կամ նախարարության ֆեյսբության էջին կամ այլ նախընտրելի միջոցով։ Մասնագետների հետ մեկտեղ կգտնենք փաթեթային լավագույն լուծումը։ Ընթացքի մասին կտեղեկացնենք լրացուցիչ։ Հարգանքով՝ Մանե Թանդիլյան»:

Понравилась статья? Поделиться с друзьями: